BUTUAN CITY – Gipaneguro sa Office of the Ombudsman nga “frozen” o padayon nga naka-freeze ang mga assets sa tanang nalambigit sa kaso sa anomalya sa flood control projects.
Sa usa ka pahayag, gipasabot ni Assistant Ombudsman Atty. Mico F. Clavano nga wala pa gihawiran sa mga respondents ang ilang kwarta o assets nga naa sa bangko.
Bisan pa man adunay mga “freeze order” nga na-expire batok kanila, gibutyag ni Ombudsman Spokesperson Clavano nga nakadawat ang ahensiya og “asset preservation order.”
Nagpasabot kini nga magpabiling naka-freeze ang mga bank accounts sumala sa “civil forfeiture cases” nga gisang-at batok sa mga giakusahan ug giimbestigahan nga nalambigit sa korapsyon.
Gipatin-aw usab sa tagapagsulti sa Office of the Ombudsman ang teknikalidad aron mapadayon nga “frozen” ang mga bank accounts sa mga nalambigit.
Bisan pa sa “expiration” sa mga “freeze orders,” positibo nga gi-share sa opisyal ang pamaagi sa tanod-bayan aron dili na mabalik sa mga respondents ang ilang bank accounts.
Samtang, gisiguro ni Jesus Crispin ‘Boying’ Remulla nga padayon ang ilang imbestigasyon bahin sa anomalya sa flood control projects.
Gipanghimatuud niya ang naunang posisyon nga dili na maghisgot kinsa ang sunod nga makakasuhan, apan gihagit ang publiko nga maghulat usa.
