BUTUAN CITY – Padayon pa ang imbestigasyon sa kapulisan sa lungsod sa Remedios T. Romualdez kon RTR, Agusan del Norte aron ma-ilhan og mapanubag ang responsable sa pagpusil-patay sa usa ka lumad nga asset matud pa sa militar.
Naila ang biktimang si Dionesio Sulin-ay Bolilao, 40-anyos, minyo, dunay pito ka mga anak og residente sa Brgy. San Antonio, sakop sa maong lungsod kinsa napalgan na lang nga wala na’y kinabuhing nagbuy-od sa bukirang bahin sa Sitio Labintik, sa susamang barangay.
Sumala pa ni Police Sr. Inspector Sajulga, Hepe sa RTR Municipal Police Station nga kagahapon sa alas 9:30 sa buntag sa dihang midangop kanila ang igsoon sa biktima nga si Marrieta Dawiraw kalabot na sa maong panghitabo.
Migawas sa imbestigasyon ngadto sa mga kabanay sa biktima nga nakadawat matud pa kini og bahad gikan sa mga rebeldeng New People’s Army human nga nahimo kining asset kaniadto sa kasundaluhan.
Gitu-uhang gikulata una kini adiser gipusil resulta sa iyang kamatayon.
Tungod sa pagbalibad sa kabanay nga ipa-autopsiya ang patay’ng lawas sa biktima, dili na matumbok sa kapulisan kung pila gayud ka samad pinusilan ang nahiagum sa biktima.
