BUTUAN CITY – Palig-onon sa Association of Southeast Asian Nations kon ASEAN Plus Three ang kooperasyon sa sektor sa turismo subay sa pagpadayon sa usa ka semana nga ASEAN Tourism Forum 2026 nga ginahigayon sa Cebu City sugod ning adlawa, Enero 27.
Ang maong kalihokan gipangunahan ni Department of Tourism (DOT) Undersecretary Verna Buensuceso, kinsa mao usab ang Chairman sa Philippine National Tourism Organization, dungan sa ika-48 nga Meeting sa ASEAN Plus Three National Tourism Organizations (NTOs).
Ilalom sa tema nga “Navigating Our Tourism Future, Together,” nagtigom ang mga senior tourism officials gikan sa lain-laing mga nasod nga miyembro sa ASEAN, kauban ang ilang dialogue partners nga China, Japan, ug South Korea (Republic of Korea).
Tumong sa forum nga mas mapalig-on pa ang panaghiusa sa rehiyon ug mapadali ang pagbangon ug padayon nga kalamboan sa sektor sa turismo.
Gihisgutan usab sa miting ang ASEAN Tourism Sectoral Plan (ATSP) Post-2025, nga nagtumong sa pagpalalom sa panaghi-usa ug kolaborasyon sa ASEAN Plus Three alang sa mas lig-on nga kaugmaon sa turismo.
Dako ang pagpasalamat ni Hironobu Nara, Deputy Commissioner sa Japan Tourism Agency Ministry, ngadto sa tanang mitabang ug misuporta aron magmalampuson ang maong kalihokan.
Nagpa-abot usab siya sa iyang mga pahasubo ngadto sa mga namatay sa trahedya sa nahugmak nga landfill sa Binaliw, Cebu City niadtong Enero 8, ug iyang gipasalig ang mga pag-ampo alang sa tanang apektado aron makabangon sa labing dali nga panahon.
