BUTUAN CITY – Mipadayon si Alex Eala sa iyang impresibong dagan sa ASB Classic human niya napildi ang ikalimang seed ug 2023 Australian Open semifinalist nga si Magda Linette sa score n ga 6-3, 6-2, rason sa iyang pagsulod na sa semifinals human sa dula ning buntaga lang sa Auckland, New Zealand.
Ang ika-upat ka seed nga si Eala maoy midomina sa dagan sa usa ka oras ug 37 ka minutos nga duwa, nga nagpaduol kaniya sa ikaduhang WTA singles title.
Human mag-ilisay og break sa serbisyo sa unang duha ka games, napanalipdan sa duha ka magdudula ang ilang serbisyo hangtod nabuak ang serbisyo ni Linette sa ikaunom nga duwa, nga nagtugot kang Eala nga makakuha og 3-2 nga bentaha.
Gipahimuslan sa 20-anyos nga Filipina tennis sensation ang momentum, ug gidomina ang sunod tulo ka games aron makuha ang unang set.
Puno sa kumpiyansa, nahimong mas agresibo si Eala sa ikaduhang set ug dali nga naka-una og 4-0 nga bentaha sa wala pa makit-an pag-usab ni Linette ang iyang ritmo, nga midaog sa sunod duha ka games aron mapagamay ang gintang ngadto sa 4-2.
Apan dali rang nakuha pag-usab ni Eala ang kontrol, gibungkag ang serbisyo ni Linette sa ikapito nga game ug gisilyohan ang kadaugan sa mosunod nga duwa.
Bisan pa sa kadaugan pinaagi sa straight sets, aminado si Eala nga ang panag-agbat nila Linette naghimo sa tibuok duwa nga mas lisod.
