BUTUAN CITY – Tingkagol na sa karsel ang usa ka bana human niini gipusil-patay ang iyang asawa pasado alas-2:30 sa hapon sa nakalabay nga adlaw sa may Barangay San Pedro, Lianga, Surigao Del Sur.
Nailhan ang suspek nga si Narwin Andales samtang ang biktima mao si Virgilita Andales, parehong miyembro sa Civilian Armed Forces Geographical Unit kon CAFGU nga residente sa maong dapit.
Nasuta nga nagselos ang suspek sa iyang asawa kondiin duha ka bulan na silang walay maayong tinagdanay.
Gi-angkon usab sa suspek nga kanunay niyang masakpan ang asawa nga dunay ka-videocall sa cellphone ug wala musanong sa iyang hangyo nga magbalik sila.
Tungod sa wala mapugngan nga selos, samtang anaa sa gawas sa balay ang biktima, iyang gikuha ang issue niyang M16 armalite rifle nga maoy gigamit sa pagpusil.
