BUTUAN CITY – Gikumpirma sa gobyerno sa Timor-Leste nga nakatakdang ibalik sa Pilipinas ang gipalagpot nga kongresistang si Arnulfo Teves Jr. kansa nagtimaan nga ang presensya ni Teves, nagrepresenta sa seryoso ug dili madawat nga sitwasyon sa ilang nasud.
Kini usab matud pa ang miguba sa bilateral relations tali sa Pilipinas ug sa Timor-Leste.
Nasayrang duna na’y dili maayong imahe ang Timor-Leste human nga nahimo na kining dangpanan sa mga indibidwal nga gilayasan ang pangkalibutanong hustisya nga maoy miguba sa integridad sa ilang borders ingon man sa pagbatuk nila sa transnational crimes. Ang desisyon sa Timor-Leste government nga pabalikon si Teves sa Pilipinas, administratibong lakang sa ilang Ministry of Interior rason nga wala’y saktong legal nga authorization human gikansela ang iyang pasaporte.
Dugang pa sa gobyerno sa Timor-Leste, tungod sa krimen nga gihimo ni Teves sa Pilipinas, gidid-an na kining makasulod sa ilang nasud sulod sa napulo ka tuig, base sa ilang migration ug asylum law.
Madumdumang gitudlong mastermind si Teves sa pagpatay kang anhing Negros Oriental Governor Roel Degamo ug uban pang mga krimen sa nasangpit nga lalawigan.
