BUTUAN CITY – Nakadawat na og kumpirmasyon ang duha ka opisyal sa United States aircraft carrier USS Abraham Lincoln ug uban pang guided-missile destroyers nga nakaabot na sa Middle East ilawom sa U.S. Central Command.
Kini nagpalapad sa kapasidad ni President Donald Trump sa pagpanalipod sa mga puwersa sa U.S. ug posibleng paglihok sa militar batok sa Iran.
Gipadayag ni Trump nga adunay armada kon sea fleet nga padulong sa Iran, apan naglaum siya nga dili kini magamit.
Ang mga barko gisugdan pag-deploy gikan sa Asia-Pacific niining bulana tungod sa nagkataas nga tensyon tali sa U.S. ug Iran human sa crackdown sa mga protesta didto.
Dugang pa, ang Pentagon nagpadala usab og fighter jets ug air-defense systems sa rehiyon ug maghimo og military exercise aron ipakita ang abilidad sa U.S. nga mag-deploy ug magpadayon sa combat airpower.
Usa ka Iranian official ang nagbutyag nga bisan unsang pag-atake tan-awon nila nga “all-out war.” Samtang ang United Arab Emirates nagpadayag nga dili nila tugotang gamiton ang ilang airspace ug teritoryo alang sa hostile military actions batok sa Iran.
