BUTUAN CITY – Namatay ang Armed Forces chief of staff nga si Abdolrahim Mousavi, kauban ang pipila ka mga tag-as nga opisyal sa militar human ang pag-atake sa United States ug Israel kontra sa Iran.
Base sa gipagawas nga listahan sa state TV, lakip usab matud pa sa mga namatay sila Defense Minister Aziz Nasirzadeh, Revolutionary Guards chief, Mohammad Pakpour, ug defense head Ali Shamkhani.
Sumala sa taho, nahitabo ang mga strike samtang gihimo ang “defense council meeting” batuk sa pag-atake sa US ug Israel.
Sa bulag usab nga airstrike, namatay usab ang Police intelligence chief sa Iran nga si Gholamreza Rezaian.
Misunod niini ang paglusad sa Iran og bag-ong hugna sa missile ug drone attacks nga mitarget sa mga military base sa US sa rehiyon ug sa Israel diin usa matud pa kini ka lakang isip balos sa halapad nga pag-atake sa duha ka nasud nga gikamatay matud pa sa ilang supreme leader.
Lakip sa mga gitarget ang 27 base sa US sa rehiyon lakip na ang military headquarters sa Israel ug usa ka defense industries complex sa Tel Aviv.
