BUTUAN CITY – Patong-patong nga kaso ang atubangon sa usa ka armadong kawatan human kini nasapon sa mga residente sa Purok-11, Barangay Obrero ning siyudad sa Butuan alas 4:00 sa buntag.
Naila ang suspetsado nga si Romeo Labadan Martinez-41-anyos, nga taga San Mateo, Mainit, Surigao Del Norte.
Nasayrang nangawat ang suspek sa panimalay ni Antonio Dulera, 24-anyos ug kapuyo niining si Aileen Galon, 20-anyos sa dihang namatikdan sa tag-iya.
Sa dihang gisita ang suspek, nagpabuto kini sa iyang dalang .38 nga kalibre sa pistola sa 3 ka higayon.
Mas maayu nalang matud pa kay wala sila ma-igo apan nakamata ang ilang mga silingan nga mitawag ug police ug mitabang sa pagsikop sa suspek.
Padayon usab nga gipakisayran karun sa kapulisan kung ang suspek ba ang tag-iya sa bike nga nakaparking dool sa maong lugar ug masuta kini susamang suspek ba ang nagbuhat sa mga kawat nga nahitabo sa dakbayan, sama nalang sa mga police nga iya pa kining gipangpusil.
Gipanawagan nalang ang mga nabiktima sa kawat ning siyudad nga modalikyat sa Butuan City Police Station -2 aron ilhon kung susamang suspek ba ang ilang gidudahan.
