BUTUAN CITY – Pursigido si Surigao del Norte Governor Francisco Matugas nga pasakaan og kaso ang usa ka 43-anyos nga architect tungod wala pagtug-an sa tinuod dihang misulod kini sa maong lalawigan gamit ang negative antibody-based result.
Base sa taho gikan sa probinsyal nga panggamhanan, gikan ang babayeng architect sa Quezon City kinsa naka-abot sa lungsod sa Dapa niadtong Septembre 5 ug mi-adto sa surfing capital sa Pilipinas didto sa lungsod sa General Luna sa Siargao Island sakay sa lantsa.
Isip pagsunod sa health protocol, gipa-ilalom kini sa swab test pagka-Septembre 7 ug didto na nasayran nga positibo kini sa COVID-19 rason nga daling gi-quarantine pagkasunod adlaw didto sa Surigao del Norte Provincial Hospital.
Padayon karon ang gihimong contact tracing sa Municipal Disaster Risk Reduction and Management Office kon MDRRMO-General Luna sa mga naka-close contact niini apil na ang iyang mga kasakay sa lantsa.
