BUTUAN CITY – Gikumpirma ni Michael Jibson Hernandez, ang regional vice president sa Philippine Health Insurance Corporation kon PhilHealth-Caraga nga sugod niadtong Enero 1 ning tuiga, dili na accredited kanila ang Butuan Doctor’s Hospital kon BDH.
Kini ang gikaro sa opisyal subay kini sa nabaniog diha sa social media, nga tungod kay dili na accredited sa maong state health insurer ang maong ospital, wala na sila’y refund nga ihatag ug bayaran una sa pasyente ang tanang anaa unya sa ilang hospital bills.
Sa eksklusibong pakighinabi sa Bombo Radyo, gipadayag ni Hernandez nga duna pa’y mga isyu sa ilang sentrong buhatan nga kinahanglan nilang resolbahon.
Sa iya matud pang pag-abot ning rehiyon sa tuig 2022, gi-deny na ang application for accreditation sa maong ospital ug base sa iyang nasayran, accredited pa man kini sa ilang ahensya niadtong tuig 2021.
Gila-umang human matud pa sa ilang tigom uban sa mga regional vice presidents, makamugna na sila og resolusyon kung unsaon pag-abante, sa ingon subling ma-accredit kanila ang maong balay-tambalanan.
Wala gibutyag sa opisyal ang hinungdan sa pagka-deny sa accreditation sa maong ospital tungod kay wala na sila’y hurisdiksyon niini sa regional level.
Aminado usab kining dili una magamit sa mga PhilHealth members ang ilang makuha untang benepisyo higayong magpa-admit sa BDH hangtud nga dili pa maresolba ang isyung pending karon sa ilang central office.
