BUTUAN CITY – Nagpakitabang dinhi sa sibyahan sa Bombo Radyo – Butuan ang usa ka lola human nga wala pa gihapon mahatagi ug hustisya ang paghimong sex slave sa ama-ama niini ngadto sa kinamagwangan niyang apo.
Sa eksklusibong pakighinabi ning sibyahan, gibutyag sa wala panganling lola nga nagsugod matud pa ang pagkonsumo ngadto sa iyang apo sa nag-edad pa kini nga 13-anyos hangtud nga nag-edad na kini karon ug 18-anyos.
Iyang gisaysay, anak sa pagkadalaga sa iyang anak ang iyang kinamagwangang apo kinsa naminyo pag-usab sa maong suspek.
Tungod sa kalisod sa kinabuhi, mi-abroad ang iyang anak ngadto sa Hong Kong dihang 13-anyos na ang iyang apo kondiin dinhi usab matud pa nagsugod ang linuog nga binuhatan sa suspek. Tungod sa bahad niining pamatyon sila uban sa iyang mga igsoon og siya nga apuhan, upat ka tuig nga gitago sa biktima ang iyang nadangatan kinsa gikunsumo usab sa maong panahon.
Nahibal-an na lamang nila ang panghitabo dihang misumbong kaniya ang manghod sa biktima kalabot sa iyang namatikdan matag-tulog nila sa gabii diin alsahon matud pa sa suspek ang iyang ate og isulod sa kwarto.
Nakumpirma lang ang tinuod nga panghitabo dihang mitug-an na ang biktima human nga milayas na sa ilang lugar ang suspek kinsa padayon pa karong gipangita.
Nasayrang ila nang gidangop sa kapulisan ang maong kaso apan ang gikadismaya niua mao ang kadugay sa aksyon nga gihimo sa mga otoridad tungod kay halos mag-pito na ka bulan apan wala pa gihapon nadakpan ang suspek bisan paman nga aduna na kini warrant of arrest. (Mon Aplaya)
