BUTUAN CITY – Pursigido ang usa ka residente sa Buenavista, Agusan del Norte nga pangitaon ang hustisya alang sa mga kabus human nabiktima sa anumalsong distribusyon sa Special Amelioration Program kon SAP niadtong Biernes, Agusto 21.
Sa iyang pagdangop sa Bombo Radyo Butuan, gipadayag sa gitago lang sa pangalang Tonyo, residente sa Brgy. 9, sakop sa maong lungsod nga sa covered court gihimo ang SAP distribution kondiin naglinya ang mga tawo sa buntag pa lang ngadto na sa udto kondiin daan na niyang namatikdan nga nagkagubot sa kilid nga bahin.
Una na siyang natingala nganong apil siya sa gipatawag taliwa nga wala siya malakip sa unang tranche niini tungod kay wala usab siya nag-apply rason nga iya kining gi-adtuan.
Dako na lang ang iyang kadismaya dihang sa iya nang turno, gisultihan siya sa mga nanguna sa distribusyon nga anaa sa lamisa nga dili 5-mil pesos ang iyang madawat kondili 1,800-pesos lang sa rason nga gikuhaan na matud pa kini sa Tulong Panghanapbuhay sa Ating Disadvantaged/Displaced Workers kon TUPAD program sa Department of Labor and Employment kon DOLE.
Tungod kay dili siya mahiluna sa harap-harapang pagpangilad sa katawhan nga maoy gimulo usab sa iyang mga tagil-barangay, iyang gi-uban ang ilang barangay secretary ngadto sa DSWD-municipal office nga ka-abag sa taga-DOLE, Department of Social Welfare and Development kon DSWD-Caraga Region aron mangayo og xerox copy sa mga anaa ang iyang pangalan aron iyang makita kung kinsa ang mipirma niini, in-behalf kaniya.
Dismayado siya tungod kay gisultihan siyang wala matud pa siya’y makuhang kopya sa rasong dili matud pa musugot ang ilang labaw hinungdan nga mi-adto gilayon sila sa DOLE-Caraga regional office og gipa-abot na ang maong concern ngadto sa regional director.
Gisaaran matud pa siyang hatagan og certification nga magpamatuod nga wala malakip ang iyang pangalan sa mga SAP beneficiaries sa ilang lungsod dayong saad nga dinhi na niya sugdan ang pagpangita og hustisya dili lang alang kaniya kondili alang sa tanang kabus nga nabiktima sa gikurakot nga kwarta sa gobyerno nga alang unta sa mga tawong naglisod ning panahon sa pandemya.
Kung dili matud pa niya kini himuon karon, magdasa ang mga anaa sa gobyerno ilabina nga kadaghanan nagpakabuta-bungol lang sa maong kaylap na nga kurapsyon.
Gusto niyang mapanubag ang ang mihimo niini nga kaya matud pa niyang ma-trace gikan sa mga opisyal sa ilang barangay nga maoy mi-assist sa mga taga-munisipyo, taga-DSWD ug taga-DOLE nga maoy nang-apod apod niini.
Gikuhaan na og reaksyon niini nga alegasyon ang Buenavista-LGU apan mibalibad pa kini sa rasong nag-meeting pa sila apan bisan pa man, pabiling bukas ang sibyahan alang sa ila unyang himuong pagpasabot.
