BUTUAN CITY – Mikumitar na ang taga-Agusan del Norte Electric Cooperative, Inc. kon ANECO ug ang Department of Public Works and Highways kon DPWH-Caraga aron ibalhin na ang mga poste sa kuryente nga anaa pa sa tunga ug sa kilid nga bahin sa dalang napadak-an tungod sa road widening project sa gobyerno.
Kini ang giklaro ni Konsehal Vincent Rizal Rosario, chairman sa Committee on Utilities sa Sangguniang Panlungsod sa eksklusibong pakighinabi ning sibyahan.
Gibutyag sa konsehal nga duha ka committee hearings na ang ilang gihimo nga gitambungan sa mga rpresentante sa maong mga buhatan aron lang masulbad na ang maong problema ilabina nga pipila na ka mga digrasya sa kadalanan ang natala tungod niini.
Sigon ni Konsehal Rosario, magpatawag na usab siya og laing pagdungog sa iyang komite aron ma-update niya ang gihimong lakang sa ANECO ug DPWH-Caraga.
Kini ilabina nga daw wala pa sila magkasinabot sa paagi paggahin og pundo aron mawala na sa kadalanan ang mga poste human nga taud-taud nang giprolema sa katawhan ilabina sa mga lugar nga wala’y street lights ug wala kaayo’y mga balay.
Samtang sa mga poste usab nga nagbitay na ug ang mga wire na lang sa kuryente ang naghawid kansa mas delikado alang sa katawhan, gibutyag ni Konsehal Rosario nga ang gitahasan sa pag-atiman niini mao ang gimugnang task force sa city government apan iya usab kining ipa-abot nga concern ngadto sa City Engineering Office aron ma-atiman na kini.
