BUTUAN CITY – Napili sa parliamento sa Thailand isip kandidato pagka-primero ministro si Paetongtarn Shinawatra, ang anak, nga babaye sa billionaire tycoon ug kanhi lider nga si Thaksin.
Sa edad nga 37-anyos, siya unya ang pinakabatang primero ministro ug ikaduhang babayeng mulingkod sa maong posisyon sunod sa iyang iyaan nga si Yingluck.
Ang iyang pagkapili natigayon duha ka adlaw human gi-dismiss si kanhi Prime Minister Sret-tha Thavisin sa usa ka constitutional court.
Ang duha parehong gikan sa Pheu Thai Party, kansa ikaduha lang sa 2023 election apan nagmugna og ruling coalition.
Gi-atubang karon ni Paetongtarn ang lisod nga tahas sa pagpabalik sa maayong ekonomiya sa ilang nasud ug paglikay sa mga kudeta ingon man court interventions nga maooy mipahagba sa upat na ka mga kanhi administrasyon nga gipangunahan sa iyang partido.
Nakadawat kini og 319 ka mga endorsements ug 145 nga supak kaganina ug siya ang ika-upat nga membro Shinawat clan nga mahimong prime minister sulod sa duha ka dekada sunod unya sa iyang amahang si Thaksin ug iyaang si Yingluck, human napalagpot pinaagi sa military coups o kaha constitutional court rulings.
