BUTUAN CITY – Tingkagol sa karsel ang usa ka anak human niini gipang-unay og tigbas ang iyang mga ginikanan nga miresulta sa kamatayon sa amahan og landig sa ospital ang inahan.
Nahitabo kini bandang alas 8:00 sa nakalabay nga buntag sa Purok 7, New Masbate, Barangay Inayangan, Calinan District, Davao City.
Base sa imbestigasyon sa kapulisan, samtang nagbugha og kahoy ang amahan nga 71-anyos nga si alyas Ernest kalit lang kini nga gitigbas sa anak nga si alyas Jick kaduha ka higayon sa likod nga miresulta sa hinanaling kamatayon.
Human niini, misulod siya sa balay og didto gitigbas usab ang iyang inahan nga si alyas Beth, 58-anyos nga na-igo sa ulo.
Misibat usab ang suspek apan nasikop gihapon kini sa kapulisan nga mihimo og hot pursuit operation.
Nasayran nga nakalalis una sa suspek ang iyang ginikanan tungod kay gusto sa ginikanan nga magtrabaho ang anak nga gikasuko niini. Ang suspetsado dunay history usab nga nakagamit og ilegal nga drogas.
