BUTUAN CITY – Mag-atubang og mga kasong illegal discharge of firearm, alarm and scandal, ug paglapas sa Republic Act 10591 kon mas nailang Comprehensive Firearms and Ammunition Regulation Act ang usa ka lalaking nagpabuto og armas ug nagmugna og kasamok ning mi-aging alas-7:00 sa buntag sa Purok 5 Ube, Brgy. Maon, ning syudad sa Butuan.
Agi’g pagsanong sa “5-minute response time” policy, ang mga personahe sa Mobile Patrol uban sa SWAT team daling miresponde sa maong insidente kondiin ilang na-abtan ug nadakpan ang suspek nga si alyas “Balolong,” hingkod ang panuigon, ulitawo, walay trabaho, ug residente sa maong barangay.
Nakuha gikan kaniya ang usa ka caliber 357 Magnum nga gikargahan og duha ka buhing bala, ug usa ka sundang nga adunay sakoban.
Gidala na ang suspek ug ang nakumpiskang armas sa Butuan City Police Station 1 alang sa tukmang disposisyon.
