BUTUAN CITY – Mahimo matud pang kataw-anan ang Estados Unidos higayong mudaog pagka-presidente ang konbiktado sa kasong felony nga si kanhi President Donald Trump.
Sa eksklusibong pakighinabi sa Bombo Radyo Butuan, gibutyag ni Bombo international correspondent to the United States of America Ferdinand Nakila, nga ang hini-usang hukom nga gipakanaog sa mga jurors batuk sa 34 ka ihap sa kasong pag-falsify ni Trump sa iyang mga business records, pamatuod lang sa kakusog sa mga ebidensyang gihapak batuk kaniya.
Bisan unsa pa man ang mahimong silot nga ipakanaog sa korte karong Hulyo, alang kang Nakila, angayang huna-hunaon sa tanang mga botante sa Amerika kung angayan bang ibutang sa pwesto si Trump nga siguradong maghatag matud pa og kaulawon sa maong nasud tungod kay siya unya ang unang presidente nga matanggong sa bilangguan atol sa iya unyang pagpangatungdanan.
Bisan pa man sa mang conviction, nagtuo si Nakila nga kung duna may mu-atras sa ilang suporta kang Trump, hayan kadto lang mga batan-on tungod kay gipatuo man ngadto sa iyang mga supporters nga politically-motivated kini.
