BUTUAN CITY – Gi-aresto sa New York City Police kon NYCP si American singer Justin Timberlake tungod sa pagmaneho og sakyanan bisan nga hubog.
Sigon sa Suffolk County District Attorney’s Office, nadakpan ang pop star sa Sag Harbor, usa ka sikat nga village sa Hamptons, nga maoy paboritong summer destination sa mga sikat nga tawo sa Long Island.
Gibuhian siya human nakapyansa dihang gikasuhan na. Nasayrang sakay si Timberlake sa iyang kolor grey nga BMW kondiin wala kini mihunong sa stop sign ug wala mupadaplin sa dalan dihang gipara sa mga pulis.
Baho matud pa sa ilimnong makahubog ang gininhawa sa singer ug pula pa ang mga mata. Dugay matud pa kining mia-ilalom sa sobriety tests ug mibalibad pa sa breathalyser test apan mi-angkong nag-inom sila sa balay sa iyang higala.
Kaniadto pa mi-angkon ang pop star nga nagpakitabang na siya tungod sa iyang pagka-palahubog.
Nasayrang sa estado sa New York, ang penalties sa kasong duna’y kalambigitan sa pagmaneho nga hubog mao ang pagkabilanggo og hangtud sa usa ka tuig, multa nga $1,000 kansa bugti sa kapin P58K ingon man ang suspension sa driver’s licence sa pinaka-ubos unom ka mga buwan.
