BUTUAN CITY – Napili isip bag-ong Santo Papa sa Simbahang Katoliko ang Amerikanong si Cardinal Robert Francis Prevost human nga ningbuga og puti nga aso sa panghaw sa Sistine Chapel bandang alas 12:15 ang takna sa kaadlawon sa Marso 9, oras sa Pilipinas, kansa timaan nga siya na ang bag-ong lider sa simbahan.
Nanghugyaw sa kalipay ang nagtapok nga katawhan sa St Peter’s Square dihang nakita ang puti nga aso timaan sa bag-ong napili nga lider diin makita ang managlahing bandila nga gikayab-kayab agig suporta ug paglaom nga gikan sa ilang nasod ang napiling pontiff.
Napili siya sa upat ka hugna sa botohay sa mga College of Cardinals nga maoy naglangkob sa conclave.
Makita ang mga bandila sa Argentina, Espanya, Pilipinas, Mexico, Estados Unidos, Brazil, ug uban pang mga nasod diin daghang mga katoliko ang namuyo.
Gipa-ila-ila gilayon ni French Cardinal Dominique Mamberti ang bag-ong Santo Papa isip si Leo XIV, 69-anyos, ang pinaka unang Amerikanong Santo Papa sukad sa kamugnaan sa Simbahang Katoliko, 2-mil ka tuig na ang nakalabay
Nasayrang nag-serve na kaniadto isip Prefect of the Dicastery for Bishops and Archbishop-Bishop emeritus sa Chiclayo, Peru ang bag-ong Santo Papa.
Sa iyang pagbasa sa iyang pinaka-unang Urbi et Orbi kon To the City and the World, iyang gipahinumdum ang wala’y limitasyong gugma sa Diyos kanatong tanan.
Ang pagbasa ni Pope Leo XIV sa iyahang pinaka-unang Urbi et Orbi kon To the City and the World, uban sa interpreter.
Nasayrang nakasuroy na usab sa Pilipinas ang bag-ong Santo Papa niadtung tuig 2000, diin sumala sa gipa-ambit nga mga litrato sa Order of Saint Augustine – Province of Santo Niño de Cebu, ningbisita si Pope Robert Prevost niadtung Enero 31, 2004 sa Santo Nino de Cebu Parish sa Barangay Mohon, Talisay City atol sa ika-19 nga anibersaryo sa ilang Canonical Foundation isip Domus Formata.
