BUTUAN CITY – Gisentensiyahan og unom ka bulan nga pagkabilanggo ang American livestreamer nga si Johnny Somali human mapamatud-an nga sad-an sa mga kasong may kalabotan sa public nuisance ug pagpakatag og sexual deepfakes sa Seoul.
Sumala sa korte sa South Korea, nakalapas ang 25-anyos nga ang tinuod nga ngalan mao si Ismael Ramsey Khalid human siya nag-post og video nga gihalokan niya ang usa ka estatwa nga simbolo sa mga biktima sa sexual slavery sa panahon sa World War II, ug naghimo usab og dili angay nga binuhatan sa maong memorial.
Sigon sa hukmanan nga balik-balik matud pa nagbuhat ang akusado og bastos nga mga aksyon nga nakaapekto sa publiko, ug gihimo niya kini aron makakwarta pinaagi sa iyang online content.
Gawas sa pagkabilanggo, gidid-an usab si Khalid nga magtrabaho sa mga organisasyon nga may kalabotan sa mga menor de edad ug persons with disabilities sa dihang makagawas na siya.
Si Khalid nailhan isip kontrobersyal nga content creator sa lain-laing nasud, lakip na ang Japan ug Israel, diin giakusahan usab siya sa mga lokal og harassment ug paglapas sa pampublikong kahapsay.
Sa South Korea, una na usab siyang gipugngan nga makabiya sa nasud samtang ginahimo ang imbestigasyon sa iyang mga kaso.
