BUTUAN CITY – Padayon pa ang gihimong imbestigasyon sa kapulisan sa Pilar, Surigao del Norte aron mapanubag sa ilang gihimo ang mga responsable pagpamusil-patay sa amahan og anak kagahapon sa may Sitio Paghungawan, Brgy. Jaboy sakop sa maong lungsod.
Sa eksklusibong pakighinabi sa Bombo Radyo Butuan kang PCaptain Gary Gamutan, hepe sa Pilar Municipal Police Station, gibutyag niining sakay sa ilang motorsiklo ang mga biktimang sila Rommel Espanola, 45-anyos ug ang 17-anyos niining anak, pulos residente sa Brgy. Caridad sakop sa maong lungsod.
Gikarga matud pa nila ang mga kahoy’ng ginabas dihang gipamusil sila sa wala pa masutang ihap sa mga responsable kondiin nanglapos ang mga bala sa nagkada-iyang parte sa ilang kalawasan resulta sa hinanali nilang kamatayon.
Duna na matud pa sila’y gipanubayang persons of interest ingon man mga anggulong gitutukan subay sa nagpadayon pa nilang imbestigasyon.
Narekober sa crime scene ang mga slugs sa wala pa matinong kalibre sa armas.
