BUTUAN CITY – Parehong dead-on-arrival ang amahan ug anak human kini nalambigit sa disgrasya sa kadalanan mga ala-una sa hapon sa may P-3 Barangay Mabini, Cabadbaran City, sakop sa probinsiya sa Agusan Del Norte.
Giila ni SPO2 Rolando Aljun, sa Cabadbaran City Police Station ang mga biktima nga sila Cecilio Rabi, ang amahan nga 67-anyos ug anak nga si Arjie Rabi, 34-anyos parehong residente sa Purok-1, Barangay Comagaskas sa samang dakbayan.
Base sa imbestigasyun, sakay ang mga biktima sa usa ka single motor diin ang amahan ang nagmanehu samtang angkas ang anak ug padulong unta ning siyudad sa Butuan apan pag-abot sa nahitaboan, mi-overtake ang mga biktima sa gisundan nga tricycle nga maoy pag-overtake usab sa kasugat nga Closed Van nga gimanehuan ni Lowell Dalima, 32-anyos nga taga P-4A, Lower Doongan, siyudad sa Butuan, olitawo, nga maoy hinungdan sa disgrasya.
Nadala pa sa balay tambalanan ang mga biktima apan nakabsan gihapon kini sa hinulamang kinabuhi.
Daling gikustudiya usab sa kapulisan ang suspek ug ang sakyanan samtang gipahibalo ang amo niini nga taga Davao City. (Rolan Janea)
