BUTUAN CITY – Wala pay tukmang desisyon ang pamilya Limpioso sa may Purok 2, Brgy. Patin-ay, Prosperidad, Agusan Del Sur kung mupasaka ba og kaso batuk sa kadumalahan sa beach resort diin nalumos ang kabanay nilang amahan og anak.
Nasayrang nangaligo ang pamilya Limpioso sa usa ka beach resort sa lungsod sa Cagwait, Surigao del Sur dihang gidala sa kusog nga sulog sa tubig ang grade 9 student nga si Jameson Kent rason nga dali kining giluwas sa amahang si Cirilo ‘Eloy’ apan wala pa gani niini maguniti ang kamot sa iyang anak, dali na kining gi-anod sa kusog nga sulog sa dagat rason nga sila na hinuong duha ang nalumos.
Sa eksklusibong pakighinabi ning sibyahan ngadto sa silingan sa mga biktimang si Noel Barrete, giklaro niining dihang nahinabi niya ang asawa sa namatay’ng amahan, nagbutyag kini nga dili na mupasaka pa og kaso apan kini dili pa siento porsiento ilabina kay ila pang giplastar ang haya sa mga biktima.
Dugang ni Barrete, mi-abot matud pa sa 30-minutos nga nagpakitabang ang inahan human nakita nga nagkapa-kapa na ang mga biktima apan tungod kay walay lifeguard ang maong beach resort, walay gilayo’y nakaresponde niini.
Misulay usab pagluwas ang ilang ig-agaw nga si Junrey Balanguit apan pakyas kini tungod usab kakusog sa sulog hangtud nga dunay mga surfers nga nangaligo lang usab sa maong dapit, ang misulay pagluwas sa mga biktima gamit lang usab ang ilang surfing boards.
Dakong problema ang gihambin karon sa na-ilo nga ginang tungod kay wala na ang ilang breadwinner rason nga problema niya karon ang pagpakaon ug pagpa-eskwela sa pito niya ka mga anak tungod kay ang iyang bana lang ang ilang gisaligan kinsa body builder sa Agusan del Sur Electric Cooperative kon ASELCO.
