BUTUAN CITY – Gikumpirma ni PLt. Honorio Campos, tigpamaba sa Agusan del Norte Police Provincial Office nga mismong ang amahan sa 9-anyos nga bata, ang milugos-patay niini human napalgan ang biktima nga wala na’y kinabuhi sa kasagbutang bahin sa Purok 1, Brgy. Sta. Ana lungsod sa Tubay sa maong lalawigan.
Sa eksklusibong pakighinabi sa Bombo Radyo Butuan, gibutyag sa opisyal nga tulo ka mga saksi sa maong hitabo ang mihatag na sa ilang affidavit nga nagtumbok sa 39-anyos nga si Joselito Llido Paña nga maoy mihimo sa brutal nga nadangatan sa iyang anak niadtong Marso 30.
Migawas matud pa sa resulta sa gihimong autopsy ug medico genital exam sa bata nga positibo kining gilugos ug namatay human gibundakan og gahi nga butang ang likod sa ulo niini.
Karong Lunes, pormal na nilang ipasaka ang kasong rape with homicide batuk sa suspetsadong amahan pinaagi sa inquest proceedings.
Hangtud matud pa sa pagkutlo niini nga balita, wala gi-angkon sa suspetsado nga siya ang mihimo niini sa iyang anak.
Sa pagkakaron, naghulat na lamang sila sa resulta sa gihimong drug test gamit ang ihi sa suspetsado aron masayran kung nakagamit ba kini og ilegal nga druga sa panahon nga nahitabo ang linuog nga kremin kondiin apil sa ilang gipanubayan kung nalambigit na ba usab kini sa paggamit ug pagbaligya og ilegal nga druga.
