BUTUAN CITY – Plano karon ni retired LGen. Jonnel Estomo nga mupasaka og kaso batuk kang sabungero whistleblower Julie ‘Dondon’ Patidungan alyas Totoy tungod sa pagdamay kaniya sa pagkahanaw ug pagpatay matud pa sa mga missing sabungeros.
Gi-andam na matud pa sa iyang mga abogado ang tukmang kasong ipasaka batuk kang Patidongan tungod sa wala matud pa’y basehan ug malisyusong akusasyon dayong butyag nga kampante siyang mupatigbabaw gihapon ang kamatu-uran.
Dugang sa retiradong heneral, magpresenta siya og mga ebidensya aron malimpyuhan ang iyang pangalan gikan sa pagdamay kaniya sa nangawalang sabungeros.
Madumdumang sa iyang pagduso og complaint affidavit sa National Police Commission kon NAPOLCOM, gipadayag ni alyas Totoy nga membro si Estomo sa Alpha group kansa suod sa negosyanteng si Charlie ‘Atong’ Ang kinsa gi-akusahan niining utok sa pagkawala sa mga sabungero.
Si Estomo usab matud pa ang misugyot kang Ang nga patyon siya human mitiwalag isip close aide ni Ang.
