BUTUAN CITY – Napakyas pagpanalipod si Pinay tennis star Alex Eala sa iyang 3-0 nga abante sa unang set ug wala na kini naka-recover, nga misangpot sa iyang kapildihan nga 6-4, 6-3 batok kang Polish player Magda Linette sa unang round sa 2025 Lexus Nottingham Open main draw nga gipahigayon kagabii sa England.
Napapas gilayon ang kusog nga pagsugod ni Eala sa paspas nga balos ni World Tennis Association kon WTA ranked number 31 Linette, tungod sa mapuslanong 6-1 score aron makuha ang unang set. Gidomina gihapon ni 6th seed Linette, ang dula sukad niadto bisan pa man nga nakatabla pa si Eala sa 2-2.
Apan mitira na usab ang Polish bet og laing 4-1 finishing kick batok sa WTA No. 77 nga si Eala aron makuha ang kadaugan sulod lang sa usa ka oras ug 39 minutos.
Layo ra ang maong kapildihan sa gipakita nga determinasyon ni Eala sa qualifying rounds, diin nakalabang siya sa duha ka three-set thrillers aron lang makasulod sa main tournament.
Si Linette, nga kwalipikado na sa main draw, nakapuntos og duha ka acess ug napugos si Eala sa upat ka double faults, kadaghanan niini nahitabo sa comeback sa unang set.
Ang sunod nga maka-atbang ni Linette mao ang modaog tali sa home bet nga si Mingge Xu ug si Katie Volynets sa Estados Unidos sa Round of 16.
