BUTUAN CITY – Usa na usab ka makasaysayang kadaugan ang natala sa Filipina tennis sensation nga si Alex Eala human siyang misulod sa Top 50 sa Women’s Tennis Association (WTA) rankings — ang unang Pilipina nga nakaabot sa ingon nga lebel sa kasaysayan sa tennis.
Si Eala misaka sa No. 48 sa pinakabag-ong WTA rankings human sa iyang impresibong kampanya sa mga international tournaments niadtong Oktubre.
Ang maong pagsaka bunga sa iyang konsistenteng performance sa singles events, lakip na ang iyang kadaugan sa WTA 100 ug uban pang high-level competitions.
Ang 20-anyos nga si Eala, produkto sa Rafael Nadal Academy sa Spain, ug dugay nang giila isip usa sa mga pasidunggan ug nag-asdang nga bituon sa Asian tennis.
Gawas sa iyang mga kadaugan sa junior Grand Slam, padayon siyang nagpakita og kadasig ug kahanas sa professional circuit.
Ang maong milestone dili lamang personal nga kadaugan para kang Eala apan usa usab ka inspirasyon alang sa mga batan-ong Pilipino nga gustong mosulod sa kalibotan sa international sports.
Sumala sa mga sports analysts, ang iyang pag-apil sa Top 50 magbukas og mas daghang oportunidad alang kaniya sa mga major tournaments sama sa Australian Open, French Open, Wimbledon, ug US Open.
