BUTUAN CITY – Subling makita na usab sa laing dakong torneyo si Alex Eala tungod sa segurado nang pag-apil sa Upper Austria Ladies Linz Open sa Europe aron sugdan ang iyang clay season human sa iyang dakong pagbalik sa Miami Open sa sunod semana.
Ang Linz Open, nga mahitabo sa Abril 6 ngadto sa 12 sa Austria, nag-anunsiyo sa listahan sa mga magdudula ug naapil si Eala sa main draw kauban ang mga Top 20 players nga sila Ekaterina Alexandrova sa Russia (No. 11), Clara Tauson sa Denmark (No. 17) ug Liudmila Samsonova sa Russia (No. 19).
Si Eala karon No. 32 sa world rankings, ug gilauman nga mosaka sa iyang bag-ong career-best nga No. 28 base sa live rankings, tungod sa iyang pag-abot sa Last 16 sa WTA1000 Indian Wells Open niaging semana.
Ang Linz Open usa ka 500-level tour, nga nagtimaan sa pagsugod sa clay tournament season padulong sa French Open sa sunod bulan.
Kini ang ikaduhang WTA500 tournament ni Eala human siya nakaabot sa quarterfinals sa Abu Dhabi Open, diin napildi siya ni Alexandrova sa score nga 6-3, 6-3.
Ang 20 anyos nga Filipina gilauman nga maapil sa Top 32 seeds sa Miami ug makadawat og first-round bye, sama sa iyang nakuha sa Indian Wells, diin nakadugang siya og 120 ka ranking points.
