BUTUAN CITY – Wala’y lipod-lipod nga gipadayag ni City Transportation, Traffic and Management Department kon CTTMD-Butuan head Ma. Kristina Cassion nga nagsugod matud pa ang pagpanakop sa taga-Land Transportation Office Butuan ngadto sa ilang mga sakyanan sukad niadtong gi-clamp-man sa iyang mga personahe ang sakyanan sa anak sa regional director sa maong buhatan.
Sa eksklusibong pakighinabi ning sibyahan, gibutyag sa opisyal nga gisunod nila ang protest mechanism sa LTO, tungod kay dili matud pa tinuod nga ning-agi og modification ang ilang sakyanan, ug makapamatuod niini ang certification gikan sa kompanya sa maong sakyanan kansa nagpamatuod nga old stock ang maong unit ug wala ning agi og modification.
Hinuon aminado ang opisyal nga duna usay sayop ang ilang driver tungod sa pagdumili niini paghatag sa iyang lisensya.
Tungod niini, nagpahimangno si Joshua Salcedo-Salalac, hepe sa Regional Law Enforcement Unit sa Land Transportation Office kon LTO-Caraga ngadto kang Cassion nga dili muhimo og lakang nga magtukmod na hinuon aron himuong personalan ang gihimo nila human gibungat ni Cassion nga panimalos lang matud pa ang ilang gihimo dihang gi-claman nila ang sakyanan sa regional director sa LTO rason nga gimando matud pa niini nga dakpon ang ilang mga sakyanan.
