BUTUAN CITY- Gikatakdang motestigo si kanhi Department of Public Works and Highways Bulacan District Engineer Henry Alcantara batok kang kanhi Congressman Elizaldy “Zaldy” Co sa Sandiganbayan.
Kini adunay kalabotan sa bilyones pisos nga anomalya sa Flood Control Projects sa Marso 23. Gi-anunsyo sa prosecution sa 6th Division sa Anti-Graft Court, nga mobarog isip testigo si Alcantara.
Kahinumdumang gilambigit ni Alcantara si Co isip Top Proponent sa insertions sa National Budget, kansa mingresulta sa kickback nga nagkantidad og mo-abot sa P181 Billion.
Ang maong kantidad sa kwarta gihatud matud pa kang Co, kansa nagpamatuod sa mga alegasyon ni Alcantara pinaagi sa mga ebidensya.
Gilambigit usab si Co sa P289 million nga kaso sa malversation and Graft sa Oriental Mindoro kung asa nakadawat matud pa og share si kanhi DPWH USec. Alberto Bernardo gikan kang Co pinaagi usab kang Alcantara.
Sa kasamtangan si Alcantara gipa-ubos sa Witness Protection Program sa Department of Justice diin una na usab nga mingtestigo sa mga hearing sa Senado kalabot sa mga anomalosong Infrastructure Projects.
