BUTUAN CITY – Gipanghimakak sa Malacañang ang akusasyon sa pipila ka mga kongresista nga adunay kalabutan si Pangulong Ferdinand Marcos, Jr. sa mga kickbacks nga nadawat sa pipila ka opisyal gikan sa mga flood control projects.
Sumala ni Palace Press Officer Usec. Claire Castro, nahimo na sa Kamara ang ilang mandato nga imbestigahan ang pag-apil sa pangulo sa maong isyu, ug pinaagi sa proseso natino nga walay basehan ang akusasyon.
Dugang ni Castro, dili angay gamiton nga armas ang walay lig-on nga ebidensya aron lang mahuyang ang pagsalig sa katawhan ngadto sa gobyerno.
Apan dihang gipangutana kung kinahanglan bang mosulti ang opisyal nga nalambigit sa isyu, midistansya kini ug wala mideretso og tubag ilabina sa akusasyon tungod kay wala pa nila makita ang gika-ingong text message tali sa pangulo ug ni kanhi Usec. Adrian Bersamin, nga gika-ingong “bagman” sa presidente.
Dugang pa niini nga ang gusto sa pangulo mao ang pagtutok sa pagbangon sa ekonomiya sa nasud ug pasagdan ang ubang ahensya sa gobyerno nga mag-imbestiga sa tanang impormasyon nga may kalabutan sa flood control scandal.
