BUTUAN CITY – Malampusong naaresto ang usa ka aktibong pulis atol sa gihimong drug buybust operation pasado alas 3:00 sa buntag sa may Purok 8, Sitio Cayutan, Brgy. Cagniog, Surigao City.
Naila ang nadakpan nga si Patrolman Elton Jay Alabat Galanida, alyas “Cacay””, 28-anyos, PNP member nga nadestino sa 2nd Platoon 1ST Surigao Del Norte Provincial Mobile Force Company nga nahimutang usab sa mao rang lugar.
Base sa taho, misulay pa pagbunot sa iyang pistola ang suspek rason nga kini napusilan og daling gidala sa ospital.
Nakuha gikan sa posisyon sa suspetsado ang usa ka One Thousand pesos bill nga nagsilbing marked money, duha ka sachet nga dunay sulod sa gidudahang shabu nga mitimbang sa gibana-banang 1.4 gramos nga mikantidad og halos 9-mil 500 pesos, og laing usa ka sachet usab nga dunay sulod sa dahon sa marijuana nga miabot sa usa ka gramo ang timbang nga nagkantidad og 120 pesos.
Lakip usab sa nakuha ang usa ka unit service firearms Cal. 9mm Pistol nga inubanan sa tulo ka Magazines og 28 ka mga buhing bala.
Nasayran nga ang maong pulis gikonsiderang High Value Target sa Surigao del Norte.
