BUTUAN CITY – Gipanghimakak ni Atty Joel Butuyan, accredited lawyer sa International Criminal Court kon ICC nga wala pa’y gipagawas nga desisyon ang pre-trial chamber sa ICC alang sa hangyo nga interim release sa kampo sa mga Duterte alang kang kanhi Pangulong Rodrigo Duterte.
Sa eksklusibong interview sa Bombo Radyo Philippines, nagtuo si Atty Butuyan nga apil kini sa mikaylap karong disinformation nga nagpa-init pa sa una nang gipadayag ni defense lawyer Nicolas Kaufman nga misugot na matud pa ang Philippine government sa maong hangyo.
Kini sukwahi matud pa sa una nang gipadayag ni Palace Press Officer Atty Claire Castro nga musunod ang Malakanyang sa bisan unsa mang desisyon sa ICC.
Giklaro pa sa abogado, nga ang pinaka-importanteng isyu karon sa gipangayong interim release, kung matuman ba ang tulo ka mga kondisyones sa ICC nga iyang gitagsa-tagsa pagbutyag atol sa interview.
Apil niini ang kondisyon nga kung mahatag sa ICC ang hangyo, dili na ba mabalik sa hurisdiksyon sa international tribunal ang kanhi pangulo.
Higayong mabuhian, kinahanglang masiguro nga wala’y risgong mahatag sa kanhi pangulo ngadto sa mga biktima sa mga kasong gipasaka batuk kaniya ug kinahanglang dili na usab mahitabo ang mga kreming natigayon atol sa iyang war-on-drugs campaign.
Nakita pa ni Atty Butuyan nga imposibleng sanungon sa ICC ang hangyo sa kampo sa mga Duterte, apan granting nga kini ihatag, dili matud pa mahitabo nga makapa-uli kini sa Pilipinas tungod kay dili naman membro sa ICC ang nasud rason nga wala’y magukod ang ICC sa kasiguruhang makatambong kini sa ipatawag nga mga pagtaral.
