BUTUAN CITY – Hugtanong gipanghimakak ni General Maurito Licudine – commanding officer sa 402nd Brigade, Philippine Army ang gipasi-atab ni sa rebeldeng New People’s Army kon NPA nga gatusang mga pamilya na matud pa sa Zapanta Valley sa Kitcharao, Agusan del Norte ang nanghikling tungod sa ilang nagpadayong military operations.
Sa eksklusibong pakighinabi sa Bombo Radyo Butuan, aminado si Gen. Licudine nga naglusad sila og military operations human matud pa gipatay sa rebeldeng New People’s Army kon NPA si Roy Biyog -tribal leader sa Mamanwa nga taga-Alegria, Surigao del Norte didto sa utlanan sa Brgy. Camp Edwards sakop sa maong lungsod ug sa Brgy. Hinimbangan, lungsod sa Kitcharao.
Kini gawas pa sa gi-hostage sa mga rebelde nga siyam ka mga sibilyang igo lang matud pa nangayam kondiin usa kanila ang gipatay.
Aminado ang opisyal nga sa tulo ka adlaw nilang operasyon, nakumpirma nila ang lokasyon sa mga rebelde human nila kini na-engkwentro rason nga gihimo gilayon nila ang airstrike gamit ang mga rockets og machine guns nga nagpadayon pa hangtud sa pagkutlo niini nga balita.
Apan gipanghimakak niya mao ang gipasi-atab sa walhong grupo nga nanghikling ang mga residente sa maong lugar tungod sa ilang operasyon.
Gani, gi-uyunan matud pan sa mga residente gawas nga duna usa’y pag-uyon sa probinsyal nga panggamhanan sa Agusan del Norte ang ilang operasyon.
Kini matud pa ang rason nga gipanghatdan og relief goods sa local nga kagamhanan ang mga residenteng dili makatikad sa ilang umahan tungod sa maong operasyon.
