Sa modernong panahon, daghan nang himan ang mga katawhan, arun mapadali ang tanan natong mga gimbuhaton, gikan sa pinakakumplikado nga butang, ngadto sa pinaka simple, gusto natong mapadali ang tanan.
Sama nalang sa mapang dagitab kon digital map pinaagi sa google maps ugaling gusto kang mag-explore, apan dili ka makamao mogamit og analog compass o kaha mobasa og komplikadong mapa.
Anaa usab ang mga modernong voice assistant sa mga smart homes, diin tawgon mo lang ang pangalan sa maong Voice Assistant, dayon pangutan-on o kaha sugoon sa bisan unsa nimong kinahanglan, ug kini mo tuman gilayon, o motubag sa imong mga pangutana.
Apan ang mas sikat karon nga AI mao ang mga chatbots sama sa ChatGPT, Copilot, Gemini, Claude, Grook, Meta AI, ug daghan pang uban. Ang maong mga chatboots kasagarang ginatawag usab nga mga interactive AI tungod sa kapasidad niining makig-hinabi sa sikinsa mang mogamit niini pinaagi sa mga computers o kaha sa ilang mga cellphones.
Apan unsa gayud diay ang AI, ug nganong usa man kini sa mga tima-ilhan nga anaa na kita sa modernong panahon?
Sa simpleng hubad, ang AI kon artificial intelligence, kay bisan unsang mosundog sa kalantip sa panghunahuna sa tawo.
Lakip sa makaya sa AI mao ang mga butang nga kaniadtu, mga tawo lamang ang makahimo, sama sa pagkat-on, pagrason, pagsabot, pag-sulbad og problema, pag-estorya ug pag hubad sa lain-laing mga pinulongan. Mamahimo usab kining maka mugna og mga imahe, o maka-sabot kung unsang imahe ang imohang ipakita kaniya.
Dali rang ma access ang nagkalain-laing AI karon nga panahon. Bantog gani nga daghan nang mga manggawas sa internet nga mga AI Generated text, videos, o kaha images nga daw tinood gayud sa unang lantaw.
Pinaagi sa gitawag nga Algorithms, mamahimong magiyahan ang AI kung unsaon niini pag huna-huna. Ug arun makat-on ang usa ka AI, kasagarang ginahimo sa mga computer engineers mao ang pagbahog niini og perti ka daghang mga datus. Sama matud pa sa usa ka bata, makat-on ang AI pinaagi sa pagsuhid sa mga gipakita nimong ehemplo kaniya.
Pananglitan, hatagan sa mga enhinyero ang usa ka klase sa AI og bilyones ka mga litrato sa Iring, arun makabalo kini kung unsa diay ang hitsura sa iring, ug arun nga kung sugoon kining mag generate o mohimo og hulagway sa iring, kaya kaayo niya kining himoon.
Daghan pang kayang himoon sa AI, sama nalang sa pagsummarize sa tag-as nga mga dokumpeno, ug pagkutlo sa mga importanteng pasahe lamang niini arun dili ka na laruyan sa pagbasa.
Kaya usab niining mohimo og script sa mga long forms nga mga documentary, o mohimo og essay alang sa sa mga magtutungha.
Apan sama sa tanang butang, ang AI, dili na usab maayo kung masubrahan.
Maayo man ang intensyon sa AI diha sa atung mga panginadlaw-adlawng kinabuhi, duna gihapon kini epekto kanato, nga usahay, dili nato mabatian, apan wala kita masayod, nag hinayhinay na diay kini og guba sa atung mga kaugalingon.
Sumala sa mga eksperto nga matag salig nato sa AI alang sa atung mga gimbuhaton nga gikinahanglang mogasto sa atung utok, atu matud pang giabusaran ang gitawag nga cognitive offloading.
Ang cognitive offloading mao ang paghimo og bisan unsang himan arun dili na mahago pa ang atung utok sa paghuna-huna o pag analisar. Pananglitan niini ang sobrang pagsalig sa mga search engines alang sa mga impormasyon, imbis nga mobasa og libro; pag-salig sa digital calculators imbis nga manomanong sulbaron ang mga problema sa math; ug daghan pang uban.
Maayo ang tumong sa AI sa atung kinabuhi. Mapadali niini ang mga butang nga kaniadtu, mokaon pa og pila ka oras arun lang mahuman, mapamubo niini ang bisan unsang tag-as nga basahon, matubag niini instantly ang atung mga pangutana nga perti kalaowm, o kaha perti rang mabawa.
Apan sama sa panultihon, dili maayo ang subra. Dili na maayo og manubra na ang atung pagsalig sa AI, ilabina kon himoon nato kini arun manglimbong sa eskwelahan, o kaha sa trabaho. Ug labaw sa tanan, dili na maayo kung dili na kita mosalig sa kapasidad sa atung utok ug magsalig nalang sa AI.
Dumdumi, tawo ang naggama sa AI, busa bisan unsa pa man niini ka gamhanan, mas bililhon gihapon ang atung huna-huna ug pangutok, kun tiandi sa mga himang dagitab, nga gi mugna lang arun makapagaan sa atung kinabuhi.
