BUTUAN CITY – Hugot na ang gihimong pagpangandam sa usa ka garbo ning rehiyon sa Caraga alang sa final interview round sa Search for Top 10 Outstanding Filipinos 2017.
Sa pakighinabi ning sibyahan, gibutyag ni Edgar Ilago, usa ka public school teacher nga taga- Cabadbaran City, nga mularga ugmang adlawa paingon sa kauluhan alang sa maong interview.
Gibutyag niining tulo na lang silang gipilian sa tibuok nasud aron maoy mukumpleto sa Top 10 Outstanding Filipinos 2017 alang sa teacher category.
Gihimo matud pang gibasehan sa iyang pagkapili ang iyang Project Scholaraa nga nagtabang niadtong mga kabus apan adunay kakapas nga kabataan nga makapadayon ug makahuman sa ilang pagtungha.
Ilawom sa maong proyekto nga iyang gipasiugdahan, ubay-ubay na matud pa ang nahimong professional samtang ang uban anaa na sa college level sa ilang pagtungha.
Nagpasalamat siya ug dako tungod kay wala niya damha nga nakita diay sa uban ang iyang gihimong pagpaningkamot.
Nasayrang apil sa mga mu-interview kaniya ang pipila ka mga senador, congressman, justices sa Supreme Court ug uban pa og kung ma-swertihan, mahatagan unya siya ug kahigayunan nga makatongtong sa Malacanang, Senado, ug sa Kamara alang sa pagdawat ug award isip usa sa napulo ka mga outstanding Filipinos alang sa tuig 2017.. (Mon Aplaya)
