BUTUAN CITY – Duna na usa’y bag-ong unibersidad ang lalawigan sa Agusandel Sur human nga gipirmahan na ni Pangulong Rodrigo Duterte ang Republic Act 11568, ang balaud nga nagkonberter sa Agusan del Sur State College of Agriculture and Technology kon ASSCAT nga anaa sa lungsod sa Bunawan, lalawigan sa Agusan del Sur ngadto sa usa ka state university kondiin i-integrate usab niini ang satellite campus nga anaa sa lungsod sa Trento.
Base sa balaud, ang kanhi ASSCAT, ilhon ug tawgon na isip Agusan del Sur State University kon ADSSU ug gahinan na unya kini og pundo sa nasudnong kagamhanan.
Sa eksklusibong pakighinabi sa Bombo Radyo Butuan, gipadayag ni Agusan del Sur Congressman Adolf Edward ‘Eddiebong’ Plaza nga daghan pa sila og kinahanglang buhaton aron madugangan ang mga kursong ihanyag sa maong unibersidad gikan sa kanhi education ug agriculture courses nga una nilang gi-offer.
Partikular nilang paningkamutan nga duna’y mahanyag nga mga kursong public administration ug medicine ang bag-ong university. Dugang sa kongresista, tumong sa iyang gipangamahanan nga balaud nga dili na mudayo dinhi sa Butuan ang ilang mga constituents aron lang magtungha sa Caraga State University.
Bisan og taud-taud kini niyang gitrabaho sa Kongreso wala kini igsapayan sa kongresista tungod kay ang importante nga nakab-ot na ang iyang tinguha.
Tungod niini, magahinan na sila og dako-dakong pundo nga magamit unya sa pagdugang pa og mga kursong i-offer ngadto sa mga estudyante, bahala og inanay lang.
