BUTUAN CITY – Nakatala karon og upat ka mga suspect cases ug walo ka probable cases ang Provincial Health Office sa Agusan del Sur apan wala pa’y kumpirmadong kaso.
Sa ilang gipagawas nga COVID-19 situational report, nasuta nga sa upat ka mga suspect cases, duha niini ang na-admit sa DO Plaza Memorial Hospital samtang laing duha usab ang padayong gi-quarantine sa usaka health facility.
Samtang sa walo ka mga probable cases, usa ang na-admit sa maong ospital samtang laing usa ang atua usab sa Caraga Regional Hospital sa Surigao City, usa ang gi-quarantine sa iyang panimalay samtang laing lima ang gi-quarantine sa usa ka facility.
Sa pagkakaron, 27 ka mga laboratory test results na ang ilang gipagawas, walo ang gikatakdang ipa-ilalom sa RT-PCR test; ug upat ang gihulatan na lang ang resulta.
