BUTUAN CITY – Gitagalan na Task Force COVID-19 sa Agusan del Sur si Governor Santiago ‘Santi’ Cane hangtud ugma sa alas-singko sa sayong buntag aron pirmahan ang gihan-ay na nilang executive order nga nagtumong sa pagpa-ilalom sa ilang lalawigan sa enhanced community quarantine kon ECQ.
Sa eksklusibong pakighinabi sa Bombo Radyo Butuan, gipadayag ni Governor Cane nga base kini sa nasabutan sa ilang tigom kagahapon tungod sa nagkadaghang kaso sa makamatay nga virus sa kasikbit nilang Davao Region.
Gibutyag sa gobernador nga kinahanglang dili na hulatan pa nga makatala na og usa ka kaso sa COVID-19 ang ilang lalawigan o bisan asang parte sa Caraga Region tungod kay mabutang sa delikado ang mga Caraganons.
Giklaro sa gobernador nga kini nga lakang dili lamang alang sa kaluwasan sa ilang katawhan sa ilang lalawigan kondili apil na sa katawhan sa tibuok Caraga Region.
