BUTUAN CITY – Gihatagan og kagahom ni Agusan del Sur Governor Santiago ‘Santi’ Cane ang mga mayor sa kalungsuran ug sa Bayugan City sa ilang lalawigan nga magdeklara og suspensyon sa trabaho o kaha klase kung kinahanglanon.
Tungod kini sa walay puas nga pag-ulan dungan sa pagklaro nga ang provincewide nga suspensyon sa trabaho ug klase, madeklara lang kung kadaghanan sa mga component local government units niini ang apektado.
Nasayrang kaganinang alas-11:30 sa sayong udto, padayong gi-isa ang yellow heavy rainfall warning sa mga lungsod sa Rosario, Bunawan, Trento, Sta. Josefa ug Veruela sa Agusan del Sur tungod sa Low Pressure Area kon LPA nga anaa gihapon sa bisinidad sa Mindanao.
Alayon niini, gipahimangnuan usb sa Agusan del Sur Provincial Disaster Risk Reduction and Management Council ang mga local DRRMOs sa nasangpit nga mga lungsod nga abisuhan kanunay ang mga residente sa mga barangay anaa kilid sa suba o kaha kilid sa bukid nga mag-alerto kanunay batuk sa posibleng matigayong kalit nga pagbaha ug pagdahili sa yuta.
Kini tungod na usab kay ubos sa yellow heavy rainfall warning, ang ulan anaa sa kasarangan ngadto sa kusog kansa mu-abot sa 7.5-mm ngadto sa 15-mm kada oras nga posibleng maghatud og kalit nga pagbaha ug pagdahili sa yuta sa bukirang bahin.
Sigon ni Agusan del Sur provincial government spokesperson Nonoc Plaza, magdepende na unya sa mga local chief executives sa ilang assessment kung kinahanglan na nilang magkansela og pagsulod sa trabaho o kaha klase.
Padayon pang gihulat sa probinsyal nga panggamhanan sa Agusan del Sur ang mg reports gikan sa ilang mga Municipal DRRMCs aron masayran ang damyos nga hatud sa wala;y hunong nga pag-ulan sa ilang lalawigan.
Sa eksklusibong pakighinabi sa Bombo Radyo Butuan, gibutyag ni provincial government spokesman Nonoc Plaza nga daghan na nga mga barangay ang gibahaan na apil na ang mga tunghaan ilabina kadtong mga anaa duol sa mga water tributaries.
Gani, duna na usab matud pa’y mga residenteng namakwit na sa mga evacuation centers samtang ang uban atua sa ilang mga kabanay ilabina kadtong mga barangay nga dali rang mabahaan.
Apil usab sa ilang gihulat ang mga reports gikan sa ilang mga local information officers aron masayran ang update sa nag-unang kadalanan ilabina kadtong padulong dinhi sa dakbayan sa Butuan ug padulong sa Davao area.
Gidugang sa opisyal nga sukad sa pagsugod sa pag-ulan, naka-full alert na ang mga LGUs ug gi-andam na usab ang mga evacuation sites.
