BUTUAN CITY – Gipa-ilalom na sa state of calamity ang lalawigan sa Agusan del Sur tungod sa ubay-ubay na nga mga lungsod ang nabahaan tungod sa pila ka adlaw na nga mga pag-ulan nga hatud sa low pressure area.
Atol sa 3rd special session sa Sangguniang Panlalawigan pagpanguna ni Vice Governor Samuel Tortor, hini-usang gipaboran sa mga board members ang resolusyon alang sa maong katuyuan.
Pinaagi sa maong deklarasyon, magamit na sa probinsyal nga panggamhanan ang ilang pundo nga makatabang alang sa paghatag og ayuda sa mga apektado sa kalamidad.
Samtang sigon ni Agusan del Sur provincial board member Edwin Elorde, apil sa mga nabahaang lungsod ang Veruela, La Paz, Loreto, Santa Josefa, Trento, Bunawan, Rosario, San Francisco ug Talacogon kansa level sa tubig-baha, nagpabiling kritikal.
Nag-anam matud pa kadaghan ang mga namakwit tungod sa padayong pag-ulan nga maoy nakapataas usab sa water level sa Agusan River ug sa uban pang mga water tributaries tungod usab sa pagdagayday sa tubig gikan sa Davao de Oro ug Davao del Norte padulong sa ilang lalawigan.
