BUTUAN CITY – Sugod kaganinang alas-dose sa tungang gabii, gipa-ilawom na sa community quarantine ang lalawigan sa Agusan Del Norte human gi-aprubahan sa 18th Sangguniang Panlalawigan sa ilang ikalimang special session kagahapon ang resolusyong naglatid sa maong katuyuan.
Sa maong sesyon nga gipangunahan ni provincial board member Elizabeth Marie Calo, gipasabot ni Governor Dale Corvera ang kakuyaw nga hatud sa COVID-19 uban sa ilang yinguha nga wala gyud unta’y bisan usa ka tawo ning lalawigan nga matakboyan niini.
Tungod sa community quarantine, wala na’y tawo nga gikan sa laing probinsya ang makasulod sa Agusan del Norte hangtod sa Abril 18, apan matag 7 ka adlaw tun-an ug repasohon kung angayan na baang ibalik sa normal ang sitwasyon sa lalawigan.
Ang detalye niini makita sa Executive Order nga gipirmahan ni Governor Corvera aron masayran sa katawhan ning lalawigan.
Ubos usab sa maong resolusyon, gipa-ilalom na ang lalawigan sa State of Calamity tungod sa hulgang hatud sa COVID-19.
