BUTUAN CITY – Gi-abswelto sa Sandiganbayan si Agusan del Norte Governor Dale Corvera sa duha ka mga kasong kriminal nga gipasaka batuk kaniya dihang siya pa ang mayor sa Cabadbaran City.
Kini may kalabutan na sa mga kasong malversation of public funds ug paglapas sa Republic Act 3019 kon mas nailang Anti-Graft and Corrupt Practices Act. Ang maong mga kaso duna’y kalambigitan sa ilegal nga pag-reimbursement matud pa sa iyang mga personal nga gasto.
Sa duha ka managlahing kaso, gi-akusahan si Corvera nga mipahimulos sa iyang posisyon diha sa paggamit sa pundo sa katawhan.
Gika-ingong naka-claim matud pa siya og kinatibuk-ang 362-mil, 145-pesos og 85-sentabos nga reimbursements alang sa kwartang iyang gigamit sa iyang mga biyahe uban sa iyang asawa tali niadtong Mayo 5, 2011 hangtud Hunyo 26, 2014.
Lakip niini ang iyang nagasto sa pagtambong sa mga kalihukan sa Boy Scout of the Philippines didto sa kauluhang Manila, sama sa ilang pagkaon, hotel accommodation, bayad sa eroplano og uban pang mga travel expenses sa Cebu City.
Sa eksklusibong pakighinabi sa Bombo Radyo Butuan, gibutyag sa gobernador nga pamatuod lamang kini nga inosente siya sa mga alegasyon sa iyang mga ka-atbang sa pulitika.
Dili matukib ang iyang gibating kalipay tungod kay na-atol pa ang pagpagawas sa maong desisyon sa mismong adlaw’ng natawhan sa iyang kinamanghurang anak nga atua karon sa Nepal.
Gidugang pa sa gobernador nga gawas sa pagbasura sa kasong criminal nga iyang gi-atubang, gibasura usab ang gipasakang mga kasong administratibong didto sa Korte Suprema og sa Court of Appeals.
