Aftershocks, padayong nasinatian sa Osaka, Japan

BUTUAN CITY – Daghan pa gihapong mga residente sa Osaka Prefecture, Japan ang wala’y tarong nga tulog kagabii human gitay-og sa 6.1 magnitude nga linog kagahapon.

Sigon ni Aiko Wazawa sa Takatsuki, Osaka, kini tungod kay padayon silang nakasinati og mga aftershocks.

Saysay pa ni Wazawa, tulog pa siya dihang kalit nga mitay-og ang ilang balay rason sa iyang pagtago ilalom sa kama kondiin nakita pa niya ang pagkahulog sa pipila ka mga gamit sa ilang balay.

Tungod sa maong linog, nahunong ang serbisyo sa ilang tren rason nga namaktas na lang ang mga pasahero kagahapon nga gi-alalayan usab sa mga security personnel.

Padayon pa gihapon karong gi-assess sa kagamhanan ang kinatibuk-ang damyos nga hatud sa maong linog. (Beth Ruiz)