BUTUAN CITY – Gikumpirma ni Butuan City veterinary officer Dr. Danilo Mancio-Alegado nga duna na’y kumpirmadong kaso sa African Swine Fever kon ASF sa Purok 13 ug 14 sa Brgy. Florida ning siyudad sa Butuan.
Sa eksklusibong pakighinabi sa Bombo Radyo Butuan, gipadayag sa beterinaryo nga nakatala sila og mga kaso, base na sa nadawat nilang sulat gikan sa Department of Agriculture kon DA-Caraga niadtong Miyerkules, base na usab sa gipadalang resulta sa gihimong eksaminasyon gikan sa ilang sentrong buhatan.
Human nadawat ang maong sulat, dali niya kining gipahibalo ngadto sa buhatan ni Mayor Ronnie Vicente Lagnada ug nakigtagbo gilayon siya sa mga sakop sa Butuan City ASF Task Force aron ma-aksyunan gilayon ang maong mga kaso.
Migawas sa ilang imbestigasyon nga sukad nga ang mga biyahidor nga nagdala og mga buhi pa nga baboy gikan sa Agusan del Sur padulong sa ilang destinasyon apil na sa Brgy. Florida, dinhi na na-monitor sa mga residente nga namatay na ang ilang mga binuhing baboy. AMinado usab kining ulahi na silang napahibalo sa taga-DA kalabot sa maong insidente.
Kagahapon, gisugdan na nila ang depopulation sa mga binuhing baboy ilabina sa mga lugar nga nasulod sa 500-meter radius gikan sa nakumpirmang mga kaso sa ASF.
Base matud pa sa ilang protocol, wala na’y himuong panagsabot tali sa ilang ahensya ug sa mga local hog raisers aron masigurong dili na hingpit pang mukaylap ang maong virus.
