BUTUAN CITY – Hugot nga gisupak sa Armed Forces of the Philippines kon AFP ang pagbasol sa China sa Pilipinas sa nahitabong pagbangga sa barko sa duha ka nasud atol sa resupply mission sa Ayungin shoal sa West Philippine Sea kagahapong adlawa, Lunes, Hunyo 17.
Wala usab gi-ila sa AFP ang misleading claims sa China mahitungod sa maong insidente.
Sumala ni AFP spokesperson Col. Francel Margareth Padilla, dili na nila hisgutan ang operational details mahitungod sa legal humanitarian rotation ug resupply mission sa tropang Pilipino sa Ayungin shoal. Kini tungod kay ang nag-unang isyu niini mao man ang ilegal nga presensiya sa mga barko sa China sulod sa exclusive economic zone sa atong nasud.
Gibarugan usab sa AFP official nga ang padayon nga agresibong mga aksyon sa China Coast Guard personnel nagpasamot pa sa tensiyon sa rehiyon.
Una nang nagpagawas og bag-ong akusasyon ang China batuk sa Pilipinas human niini gitaho nga mihimo og delikado nga pagpadool ang barko sa Pilipinas sa barko sa China nga miresulta sa panagbangga.
Gipasanginlan usab sa China ang barko sa Pilipinas nga ilegal nga misulod sa katubigan sa Ayungin shoal ug gibaliwala ang pila ka higayon nga pasidaan niini.
