BUTUAN CITY – Dako ang papel sa Armed Forces of the Philippines (AFP) sa bag-ong kaluha nga balaod ang Philippine Maritime Zone ug Philippine Archipelagic Sea Lanes Law nga gipirmahan ni Pang. Ferdinand Marcos Jr. niadtong Biyernes, November 8,2024.
Sigon ni AFP Chief of Staff Gen. Romeo Brawner, iyang gibutyag nga sa ilalom sa nasangpit nga balaod, mandato sa Armadong kusog sa Pilipinas partikular ang Philippine Navy nga protektahan ug pensahan ang maritime zones sa nasud ilabina sa external aggression o panggawas nga pag-atake. Samtang ang mandato sa Philippine Coast Guard (PCG) ipatuman ang balaod ilabina sa mga misupak ug wala miagi sa gitakdang sea lanes.
Sigon ni Brawner, siguraduhon sa Philippine Navy nga luwas ang maritime zones sa nasud. Seguruhon usab sa Phil. Coast Guard nga luwas ang atong kadagatan ilabina sa mga mangingisda nga nanginabuhi. Sa nasangpit nga bag-ong kaluha nga balaod malikayan na usab ang mga trahedya o panag-bangga sa mga barko. Sigon ni Brawner ilang gikalipay ang pagpirma sa bag-ong kaluha nga balaod tungod kay klaro ang hurisdiksyon sa Pilipinas sa teritoryo niini.
Dili usab magarantiya sa AFP nga muhunong na ang China sa pagpang harass sa mga sakyanang pandagat sa Pilipinas. Bisan paman, gipunto ni Brawner ang kaimportante nga dunay balaod na kita mahitungod niini.
