BUTUAN CITY – Mopahigayon og advocacy run alang sa West Philippine Sea ang ubay-ubay nga ahensya sa gobyerno, lakip na ang National Task Force-West Philippine Sea (NTF-WPS), ug Philippine Coast Guard (PCG).
Ipahigayon ang maong kalihukan sa Manila karong umalabot nga Hulyo 7, samtang sa Agosto 4 usab dunay ipahigayon sa Sugbo, ug duna usay ipahigayon karong Septiyembre 8 sa Cagayan de Oro.
Tumong sa nasangpit nga ahensya nga madugangan ang kahibalo sa mga Pilipino kalabot sa mga isyu nga nagtunhay ilabi na sa West Philippine Sea. Tawagon unya ang maong aktibidad nga “Takbo WPS: Ang Yaman Nito Para sa Pilipino”.
Samtang, nakadawat usab og pagdayeg gikan kang National Security Council (NSC) Assistant Director General Jonathan Malaya si Coach Rio Dela Cruz alang sa dedikasyon niini sa nasangpit nga inisyatiba.
Sa kasamtangan, gi-awhag sa mga nasangpit nga ahensya ang mga kompanya ingon man ang mga Pilipino nga suportahan ug mosalmot sa maong advocacy run.
