BUTUAN CITY – Giklaro ni Agusan del Sur 2nd District Representative Adolph Edward Plaza ang pagkalakip sa iyang pangalan sa listahan sa mga distrito nga adunay dakong “allocables” nga mituyok karon sa social media.
Sa iyang gipagawas nga video statement, gipadayag ni Plaza nga tinuod ang maong impormasyon ug kini usa ka dakong kaayohan alang sa probinsya, ilabina sa panahon nga nagkinahanglan pa og dugang nga pondo alang sa transportasyon, agrikultura, imprastraktura, ug pagpalambo sa lokal nga ekonomiya.
Gipunting usab niini nga ang Agusan del Sur 2nd District duna’y pinakadako nga land area sa tibuok Caraga Region, hinungdan nga mas dako ang budget allocation nga mi-abot sa P2.8 bilyon.
Dugang pa ni Plaza, daghan sa iyang naka-istorya ang nalipay sa maong alokasyon tungod kay mas daghan og proyekto ang mapatuman, lakip na ang pagpalambo sa road system sa Distrito 2 ug Distrito 1.
Iyang gisaysay nga ang pagsibya sa social media nga nagpakita og negatibong imahe batok sa distrito o sa iyang pagkatawo, dili makapugong sa tinuod nga benepisyo nga makuha gikan sa maong pondo.
Dugang pa sa kongresista, walay “wakwak” o ghost flood control project sa probinsya, ug ang tanang proyekto klaro, lehitimo, ug alang sa tinuod nga kaayuhan sa katawhan sa Agusan del Sur.
